رجعت حليمة...

شارل عقل

بعد 30 سنة حرب!

وميات الالوف من الشهدا!

والوف من المخطوفين:

شي مخطوف بسوريا..

وشي مخطوف باسرائيل..

والكل مخطوف نَفَسو...

ولبــــــنان خاصة!

مخطوف اسمو...

عملولو لسانو عربي!

بعدين صار وجهو عربي!

رجعت صارت سياستو عربية!

يوم العملو اتفاق القاهرة...

وهيك سمحو لكل نظام عربي

يحطـّ اصبعو بالسياسة اللبنانية!

وكملت معنا سنة ال76 ..

يوم تنخـّا سليمان فرنجية وقال

بخطابو الشهير:

انو لبنان عربي!

وانو كمان

حر ومستقل!!

ما بعرف كيف ظبطت معو؟

انو يكون عربي!

ويكون حر و مستقل!!

عملوه 15 سنة

رأس حربة..

بالصراع العربي الاسرائيلي!

ويا ريت حدن

من يلي بيدّعو الزعامة..

بيخبرونا:

شو هوي الصراع العربي الاسرائيلي؟

ما حدن دقـّو شوكة

إلا لبنان!

ما حدن خرّب بلدو

إلا لبنان!

ما حدن ضيـّع شعبو

إلا لبنان!

وما بقي في عدو لإسرائيل

إلا لبــــنان!

ضاع لبنان!

وضاعت القضية!

وضاع الشعب!

وضاع شادي!!

صار لبنان اليوم:

ذو الوجه الفارسي!

وذو اللسان العربي!

وذو التوجه الدولي!

كان وطن عظيم.

وشعبو كان اعظم..

صار حرباية...

بيغير اسمو تيحمي حالو!

وشعبو صار قطيع!

ماشي ما بيعرف لوين!

ولاحق زعما..

منن عارفين أي وطن بدّن...

بعد 35سنة حرب...

وبعد ما الشعب

كشف عن صدرو..

ونزل عالساحة..

وطرد المحتل...

رجع كل زعيم

يفتش عن خالتو..

لتحل مشاكل بلدو...

ورجعت حليمة لعادتها القديمة!!!

يئـّسو الشعب..

يللي بعظمتو

عملهن زعما...

وهنـّي بخنوعن

عملوه قطيع...

بيستحل الساحات!

تيلعب ورق ويشرب اركيلة!

ويحرق دواليب ويراشق بالحجار!!

هيدا منو لبنان...

هيدا وطن جديد انتو!

يا زعما آخر زمان!!

عم تعملوه...

هيدا منو شعبنا...

هيدا شعب مستورد!

او مخدر!

والباقي فقرتوه!

وهجرتوه!

وعملتوه خاتم..

تتحركوه كل ما الجوع دغدغ معدتو...

وتنيـّموه تحت خيمة مستوردة!

ومال مستورد!!

وعقايد مستوردة!

هدفها الوحيد..

اذلال اللبنانيي...

عنـّا دولة!

مع إنو العالم كلو معا!!

ما بسترجي تاخد قرار!!!

عنـّا مجلس نواب!

يا بيهز براسو

يا بيرفع ايدو

بيدون ما يعرف على شو!!

وكل مرة بيعمل اتفاقيات!

يا بتنقـّص من كرامتنا!

يا بتنقـّس من استقلالنا!

وعلى هالحالة..

لا رح يبقالنا كرامة!

ولا استقلال!

ولا رح يبقى وطن!!!

عنـّا جيش

وقت الحزّة بيروح عبيتو..

قال حتى ما ينقسم...

بنحارب نحنا عنو..

بنرجع نحنا بننقسم...

من 58 لل75 لل90 لل2000 لل2006!

صار الشعب مقسوم 5 مرات...

واسم الله الجيش بعدو موحد!

كأنو جيش من سويسرا!

ومنو ابن هالشعب!!

هيدي نتيجة التسويات..

وبعدن لليوم

وبكل وقاحة..

بدن يعملو تسويات...

كيف ممكن يصير تسوية!

بين الحق والباطل؟

بين الصح والغلط؟

بين يلي بدو لبنان لبناني

عندو كرامة واستقلال!

ويلي بدو لبنان شرّابة خرج؟

المرة الماضية قلت..

واليوم رح ارجع عيدا..

اميل لحود رح يضل رئيس جمهورية!

كلما بشار الاسد رئيس جمهورية!!

وكل تسوية بتصير..

رح تطوّل مدة رئاستو...

لا مبادرات عربية

ولا مبادرات دولية

ولا مبادرات ايرانية

ممكن تفيد!!

الا تطويل عمر الازمة

وتطويل مدة لحود بالرئاسة...

والحل الوحيد تيصير عنا وطن..

ويصير عنا دولة..

ويصير عنا جيش..

انويجتمعو هالزعما..

تحت قبة البرلمان..

بدون تلفونات..

بدون سُفََرا..

لا اجانب..

ولا اشقاء..

ومستعدين نعفي عا مضى...

شرط انو الشعب يحاصر البرلمان..

وما حدى يفل الا ما يطلع الدخان الابيض.

ويتفقو اي لبنان بدن...

يا اما:

بينحرق البرلمان باللي فيه..

وخلي الاجيال الجديدة تخلق زعما جداد..

زعما عارفين انو!

يا بيضل دخانن ابيض!!

يا بيصيرو هنـّي دخان!!!

شارل عقل 2007-03-05