نص مقابلة العماد ميشال عون التي أجراها معه الاعلامي ايلي ناكوزي عير قناة العربية الجمعة 4 أيار 2007

جدل الانتخاب من الشعب ولمرة واحدة

خلاف حول الرئاسة القادمة في لبنان

إذا لم يكن هناك انتخابات رئاسية؟

ما مدى نجاح مشروع الدولة المدنية؟

الطارئ الجديد في لبنان

ورقة التفاهم حول سلاح حزب الله

قصة "غرام سياسي" في الشارع اللبناني

مبادرة عون لعودة الحياة السياسية الطبيعية إلى لبنان

اسم البرنامج: بصراحة

مقدم البرنامج: إيلي ناكوزي

تاريخ الحلقة: الجمعة 4/5/2007

ضيف الحلقة: الجنرال ميشال عون (زعيم التيار الوطني الحر)

إيلي ناكوزي: أهلاً بكم مشاهدينا بهذه الحلقة الجديدة لهذا الأسبوع من بصراحة, وبصراحة هذا الأسبوع يلتقي من لبنان من الرابية, ومن هذه الحديقة حديقة الجنرال ميشال عون, طبعاً تحمل هذه الحلقة الكثير من الأسئلة الصريحة التي نوجهها للرئيس العماد ميشال عون حول ما يشغل بال الكثير من اللبنانيين والمواطنين العرب, أولاً طبعاً حول هذه الأزمة بين المعارضة والأكثرية, وكيف السبيل للخروج من هذه الأزمة, حول موضوع وثيقة التفاهم أو الحلف مع حزب الله, حول دعوة الجنرال إلى دولة مدنية وتبرير هذا الحلف لإنشاء دولة مدنية بحلف مع حزب ديني عقائدي في لبنان, طبعاً الكلام كثير يقال حول علاقة الجنرال بحزب الله وحول علاقته بسوريا وإيران, سنسأل طبعاً الجنرال عون عن مدى الارتباط ارتباطه هو بالحل الإيراني في المنطقة, عن التدخلات الخارجية من الأميركيين والفرنسيين.

طبعاً السؤال الأبرز اليوم الذي يطرح هو تسوية رئاسة الجمهورية, وهل يرضى الجنرال بأي تسوية أم يطرح نفسه حتى هذه الساعة مرشحاً لرئاسة الجمهورية اللبنانية؟ المأزق الذي يعيشه اللبنانيون اليوم ما هي السبل المخارج المعقولة؟ وهل يملك الجنرال مبادرة سلمية لحل الوضع؟ وطبعاً الموضوع الأكثر إثارةٍ للجدل والذي طرحه الجنرال في الأمس وهو انتخاب رئيس جمهورية مباشرةً من الشعب ولمرة واحدة فقط.

كل هذه الأسئلة وطبعاً أسئلة كثيرة تضاف إليها حول البندقية غير الشرعية, سلاح حزب الله, مقاتلة إسرائيل تدمير إسرائيل, تحرير مزارع شبعا القرار 1701 القرار 1559 كل هذه الأسئلة سنطرحها اليوم وبصراحة كما اعتدنا مع ضيفنا الجنرال ميشال عون إلى هذا اللقاء مباشرةً.

جدل الانتخاب من الشعب ولمرة واحدة

جنرال عون أولاً باسمي وباسم فريق العربية نشكرك هذا أول لقاء مطول لنا ببرنامج بصراحة, ورح يكون أعتقد مثل العادة مثل ما متعودين اللي أنا وياك تاريخ طويل نحكي فيه بصراحة, أولاً بشكرك على استقبالنا, وبدي أبدأ من الموضوع اللي أثرته من يومين, اليوم يعني يتصدر عناوين الصحف وهو موضوع الانتخابات الرئاسية اللي بدء الكلام عنه ببيروت, يعني صار فيه.. صار مثير للجدل جداً وهو الموضوع الحامي, طرحت مسألة اليوم الردود عليها بكل الصحف اللبنانية والجدال قائم, الانتخاب من الشعب ولمرة واحدة, وهذا طرحتها مش كحل وحيد بس كإمكانية حل، الناس اللي عم نسمعهم اللي عم يردوا على هذا الكلام يقولوا هذا كلام خطير يمس بالدستور, يقود البلد إلى الخراب, وهذا الكلام مفصل على قياس الجنرال عون لانتخابه رئيساً للجمهورية لمرة واحدة فقط, كل الهدف منه انتخاب ميشال عون رئيساً للجمهورية.

ميشال عون: طيب ليه يوصلوا لهون, أنا أتسائل ليش ليوصلوا للانتخابات المباشرة إذا يعتبروه مسّ بالدستور، أصلاً ما فيه مسّ بالدستور, الدستور يتعدل وفقاً للمواد الدستورية اللي فيه, ثلثي مجلس النواب فيهم يعدلوا وإحنا اقترحناها هذه كمخرج من أزمة, اليوم فيه بالعالم ثلاث أزمات, وكل أزمة منهم تستوجب انتخابات نيابية, أزمة بأوكرانيا بس انهار التحالف الحاكم عم يطالبوا بانتخابات نيابية, إحنا عندنا انهار التحالف اللي ألفه الأكثرية من نهاية 2005, بتركيا ما قدروا أمنّوا نصاب للجلسة الحزب الحاكم عم يطالب بانتخابات وهذا أيضاً حالة موجودة عنا، وبإسرائيل تداعيات الحرب عم تعمل انتخابات رح تسبب انهيارات كبيرة في إسرائيل وهالحالة كمان موجودة عنا إحنا الطرف الثاني في الحرب فيها مشاكل كثير صار, فإذن بالمقال اللي كتبته أنا منذ شهرين أقول فيه هذه الثلاثة أسباب بأي بلد عنده نظام ديمقراطي يستوجب يعملوا انتخابات نيابية لأنه كلها أحداث جسيمة تغيّر تشقلب الرأي العام رأساً على عقب، عم يرفضوا يعملوا انتخابات مبكرة, وأصلاً الانتخابات السابقة لم تجرِ بظل قانون كمان دستوري وقانون لأنه وقت اللي شرعوا قانون الانتخابات قانون 2000 قالوا فيه لمرة واحدة فقط انتخبوا فيه للمرة الثانية..

إيلي ناكوزي: بس جنرال أنت رضيت وقت اللي جيت من باريس رضيت بهذا القانون وخضت الانتخابات.

ميشال عون: ما رضيت.. ما رضيت..

إيلي ناكوزي: خضت الانتخابات على أساسه.

ميشال عون: ما رضيت, لأنه بتجي بيحطوك تحت أمر واقع يا أما الثورة بالبندقية يا أما تخلق الحد الأدنى بتخفف تحول الاضرار إلى الحد الأدنى, ثانياً قبلنا بالأضرار افترض أني قبلت بالأضرار, صرنا طعنا بعشر مقاعد نيابية قاموا حلوا المجلس الدستوري, طيب الأكثرية منّا أكثرية صحيحة ولن نقبل إطلاقاً بهالأكثرية لأنها منّا مزبوطه, منبلش بالتزوير ومنحط أيدينا على البلد بالتزوير هاي اسمها بالعربي السلطة المسروقة فإذن نحن غير مستعدين أن نمشي تحت قيادة سلطة مسروقة, فإذن الحل الصحيح هو الانتخابات المبكرة, وإلا نحن نطرح الانتخابات المباشرة من الشعب إلى رئيس الجمهورية وهيك بكون عنده صفة تمثيلية وبجي قوي, لأن الشعب انتخبه لا هو ظل لمجموعة سياسية ولا ظل لقوى خارجية, إنما إجى بتعبير شعبي استعمله الرئيس هيدا لتدعيم الدستور اللبناني واحترامه, لأنه هلأ سقط كمان الدستور اللبناني تحت خرق الحكومة المتواصل للدستور اللبناني بعشرة مواد صاروا تقريباً, ما بقى فينا نقول أنه عنا دستور, وبهيدا الدستور اللي خايفين علي هذا الحكومة حولته إلى ممسحة..

إيلي ناكوزي: بس هذا الرئيس متفق على عرف أن يكون ماروني أو إذا انتخب من الشعب ممكن أي شخصية لبنانية يترشح لها؟

ميشال عون: لذلك قلنا لمرة واحدة فقط وإذا بدهم يعملوا تعديلات بدهم يحطوا ضوابط لكي يظل الميثاق الوطني محترم.

إيلي ناكوزي: يعني الرئيس الماروني يأتي بأصوات المسلمين.

ميشال عون: أصوات المسلمين والمسيحيين.

إيلي ناكوزي: إيه بس نحنا عم نحكي اليوم أن البلد ديموغرافياً صار مشكّل، يعني أنا بحكّيك عن هواجس.. مثل بعض المسيحيين أن المسلمين هم أكثرية في البلد، وبالآخر بعد حتى يعني بعد رئاسة المجلس النيابي ورئاسة الحكومة سيقرر المسلمون هوية الرئيس المقبل بانتخابات مباشرة من الشعب.

ميشال عون: أولاً البلد اليوم مقسوم سياسياً مش مقسوم طائفياً، وهذا يمكن من حسنات المشكل اللي صار أن البلد اليوم مقسوم سياسياً مش طائفياً، ثانياً هول اللي خافوا أن المسلمين بدهم هنّن ينتخبوا رئيس الجمهورية، 16% من المجلس الحالي منتخب من قبل المسيحيين، مش 50%، فهنّ اللي معترضين على أن المسلمين بدهم هنّ ينتخبوا الرئيس، هن اللي منتخبينهم المسلمين مش المسيحيين، ولا واحد منهم شيل منهم نواب شرّي اللي أخذوا الأكثرية ضد القضاء ولا واحد من بقية النواب المسيحيين شيل اثنين منهم ما عندهم أكثرية مسيحية بالقضاء اللي بيمثّلوه.

خلاف حول الرئاسة القادمة في لبنان

إيلي ناكوزي: طيب جنرال اليوم كمان عم ينحكى بهالإطار هذا، أن الأمور عم تمشي بالقلب، صارت التسوية أو المبادرة أو التوافق رح ينطلق من الانتخابات الرئاسية يعني التوافق على رئيس جمهورية لحل المشلكة.. أزمة الحكومة الحالية لأنه فيه صوت عم يقول اليوم ارجعوا شكّلوا حكومة جديدة، ما بقى تحرز ما عاد فيه شهرين ثلاثة فيه انتخابات رئاسية. فلنتفق على رئيس جمهورية، على انتخاب رئيس، ومن ثم هالتوافق سينعكس إيجاباً على الأزمة الحالية، ولكن هذا الرئيس حسب ما عم بسمع من كل الأفرقاء لا يجب على هذا الرئيس أن يكون فريقاً لا بـ 14 آذار ولا بـ 8 آذار، هذا الفريق سيكون تسوية بين الفريقين، هل أنت راضي أن لا يكون هذا الرئيس فريق أو أن يكون تسوية بينكم وبين 14 آذار؟

ميشال عون: لأ منعمل رئيس ساعتها لقوات الطوارئ الدولية، مش للبنان. الرئيس بلبنان يجب أن يكون فريقاً، فريق لبناني أصيل بيمثل الدستور اللبناني ولديه صفة تمثيلية عن الشعب اللبناني وموقفه يكون حاسماً بفصل النزاعات ما فينا نجيب رئيس خيال، بدنا واحد إذا قال أخ يطلع جاره ينزّله على المستشفى، ما يكون واحد مقطوع ما له صفة تمثيلية، اشبعنا من رؤساء ما إلهم صفة تمثيلية بلبنان، وكل الناس بتتطاول عليه وبتتطاول على مركز الرئاسة، سيكون رئيس له صفة تمثيلية وقوي كفاية حتى يفرض احترام الدستور على الحكومة وعلى البقية، لأنه بالحالة اللي عايشين فيها نحنا عايشين بمسرحية كل مين ايدو إلو.

إيلي ناكوزي: يعني مش رح تقبل بتسوية لرئيس لا ينتمي إلى أي تيار أو أي حزب ويكون..

ميشال عون: مش قصة تسوية!! بجيب أي إنسان نكرة ما له ولا صفة نضال بالسياسة..

إيلي ناكوزي: ما عم بقول نكرة، عم بقول شخصية لبنانية يعني..

ميشال عون: كلهم شخصيات بنحترمهم من ناحية هذا.. بس بدك يكون له ماضي سياسي مش عم يشتغل هو بوسط عند تلاميذ، بين تلاميذ الراهبات، عم يشتغل بأجواء سياسية عندها ارتباطات دولية وارتباطات محلية عم برقّصوا الشعب اللبناني سعديني، بدك تجيبلي ملاك تحطّوا بين الشياطين؟ بدو يكون إنسان عندو وجود وعندو قوة سياسية يقدر يكون إلو احترام، مش أنه ساعة اللي بدنا بنطلع لعنده وساعة اللي بدنا منلبطو! رئاسة الجمهورية مشرشحة اليوم، بسبب أذواق النواب وأذواق القوى السياسية اللي عم تحرّض عليها، ما بدنا، بدنا رئيس جمهورية إذا قال لأ يعني اللأ تبعو ضمن صلاحياته تكون محترمة، مش مين ما كان يتجاوزه.

إيلي ناكوزي: طيب تيارك اكتسح بالانتخابات اكتساح تقريباً في كل المناطق المسيحية، معلش هذا هو الواقع..

ميشال عون: لأ كل الصوت المسيحي في كل لبنان أخذه 70% منه.

إيلي ناكوزي: صح، يعني مين فيه بعد ممثل للشارع المسيحي غيرك؟ يعني مين ممكن يكون رئيس للجمهورية غير ميشال عون؟ مين؟ مين بمثل هالشارع المسيحي؟

ميشال عون: طب انطور شوي ليش بدك تعمل نتيجة الانتخابات مرتين؟

إيلي ناكوزي: ما بدّي أعمل، أنا بقول عم تطلب من هذا الرئيس..

ميشال عون: بلى، عم تقلّي بما أنك أنت الأكثرية أنت سقطت فإذن، مش لازم تكون رئيس جمهورية، هذا المنطق اللي لعبة الليخا، بتعرفها لعبة الليخا؟

إيلي ناكوزي: بعرفها منيح إذا بدك منلعب..

ميشال عون: اللي بياخذ نقط كتير بيخسر، مش لازم تاخذ أصوات حتى تكون رئيس جمهورية، فإذن من هلأ ورايح ما تنتخبونا حتى نصير مرشحين لرئاسة الجمهورية، عيب هالتفكير هيدا، هذا عيب وهذا الجماعة لأنهم ما بدهم الرئيس يكون عنده صوت، ما بدهم الرئيس يكون عنده وجود حتى تظل لعبة الفساد ماشية لعبة الاستزلام ماشية، لأن رئيس ما عنده وجود برلماني معناتها رئيس ما عنده عينين، ما عنده زنود، ما عنده شيء أبداً، ولا حاسة شم حتى، فإذن هيدي هاللعبة هيدي حتى تظل الشبكة الحاكمة في لبنان وحاكمة بواسطة الفساد والإفساد وبواسطة المال السياسي، هيدي مش معقولة، هيدي منّا معقولة إطلاقاً.

إيلي ناكوزي: سؤالي يرتكز على منطلق أنه اليوم فيه ناس عم تقول الجنرال عون لن يرضى إلا بالجنرال عون رئيساً للجمهورية هذا واضح، لذلك فريق الأكثرية لن يرضى بأي شكل أن يكون ميشال عون هو رئيساً للجمهورية، لذلك يجب إيجاد تسوية وقت اللي فيه نزاع..

ميشال عون: ما بدي مش عملية استرضاء لا لإلي ولا لإلهم منّا عملية استرضاء، ما فيهم قبل ما إجي على لبنان ما بدهم ميشال عون يرجع أصلاً، وتدخلت دول حتى ما إرجع لهون، هالعدائية المبكرة الرافضة حتى إرجع على بلدي اللي أنا اللي ضحيت كل شيء من أجله، عرضت حياتي نفيت 15 سنة ما رح إتركه لناس ما عندهم لا ضمير ولا عندهم حرمة للقانون، هذول ما إلهم حق أنت راجع التصاريح والمواقف السياسية، نهار الانتخابات بـ 12 حزيران الأستاذ وليد جنبلاط بقول: إذا ربح عون الانتخابات رجعنا للحرب الأهلية، فإذن كيف بدك ياه يقبل فيّ رئيس جمهورية! لا في اتفاق بعد 8 آذار ولبعدها من 14 آذار كنا وكل شيء، فإذن هيدا التخطيط المسبق وتلزيق الشبهات وتلزيق التهم السياسية ومحاكمة النوايا هذا غير مقبول ولن نقبل فيها، هذول اللّي عم بيخططوا للجريمة وهذول عم بخططوا للصدامات ونحنا واقفين عم نمنع الصدامات تصير بلبنان، كل شيء عملناه اليوم حتى نحافظ على السلام بين اللبنانيين ونمنع هالفكر المتطرف الذي يرفض الآخر حتى يظل هالبلد غنيمة بين أيديهم، يسلبوها ويسرقوها ويسخروا الشعب اللبناني لمصالحهم الخاصة، هذول هم اللّي عم يوقفوا بالوجه، ما في 14 آذار ما 12.. كلها ألاعيب، قول لي شو جامعهم 14 آذار؟

إيلي ناكوزي: جامعهم مشروع سياسي.

ميشال عون: شو هو المشروع السياسي تبعهم؟

إيلي ناكوزي: هلأ رح إحكي عنه.

ميشال عون: شو هو المشروع السياسي تبعهم؟ هو مشروع الشركة ياللّي عم تقبض أرواح اللبنانيين وبتهجرهم هيدا المشروع السياسي، الصناعة الوطنية طارت! الزراعة طارت! القطاع التجاري كمان مهلهل صار! شو.. قول لي شو هي المشكلة اللّي حلوها من 12.. من سنة 1992 لليوم ركبوا علينا ديون الأرض كلها سوا، على شو هذول بدهم يحطوا شروط؟ سمعتهم من ناحية الفساد بالأرض! هنّ بدهم يحطوا شروط على الأوادم (بني آدمين) من الناحية السياسية ارتباطاتهم بكل العالم إلا بوطنهم هدول بدهم يحطوا شروط على ناس مش مرتبطين إلا بشعبهم وبأرضهم! هون هي المفارقة الكبرى: أنه قتل الفضيلة السياسية وإن حاربتني بعتبرها نوع من قتل الفضيلية السياسية حتى تظل الطقم الحاكم ما إله جذور هون لا متجذّر بالأرض اللبنانية ولا مرتبط بالمصلحة اللبنانية ولا مرتبط بمصلحة وطنية إطلاقاً، إنما بده يظل داشر على طرقاته وعلى العواصم اللي غيره.

إيلي ناكوزي: طيب، تأعمل خلاصة جنرال عون لن يدخل في تسوية على رئيس جمهورية..

ميشال عون (مقاطعاً): تسوية ليش لتسوية!

إيلي ناكوزي: لأنه بالنتيجة بلبنان ما فيك تطلعها من التسوية..

ميشال عون (مقاطعاً): ما فيك تطوق لي التسوية، منّا تسوية..

إيلي ناكوزي: أنا ما عم بتطوق لك، بدي خلاصة أي من نوع من التسوية على اسم بالنصف بين الفريقين..

ميشال عون: منّا تسوية بنوب (أبداً)، فإذن كل واحد بالأكثريات اللي بتتشكل منها مكونات المجمتع اللبناني لازم يكون موضوع تسوية، لازم نشيل (نزيل) كل القيادات ياللّي عندها قوة انتخابية نحطها على جنب وندخلها بتسوية، رئاسة الحكومة بتسوية ورئاسة المجلس بتسوية ورئاسة الجمهورية بتسوية ونستعرض منجيب ناس من السويد من فرنسا أو منستعير من عند الدول العربية رؤساء لحكوماتنا، مش أحسن ما يكون في عندهم بلكي عندهم زلمة بعد ماشي ورائهم..

إيلي ناكوزي: ما كل عمرها هيك البلد كل عمرها ماشية عالتسوية..

ميشال عون: لأ يا خيّ (أخي) بدك تصلحها..

إيلي ناكوزي: بين الأفرقاء في تسويات..

ميشال عون: نبلش من اليوم نصلحها، منروح.. لأ منستقرض من عند الجيران رئيس حكومة ورئيس جمهورية هيدا منّه (ليس) منطق.

إيلي ناكوزي: في شي رئيس جمهورية إجى (جاء) بلبنان بدون توافق وتسوية منذ تاريخ تأسيس الدولة لليوم طيب وأنت معلوماتك التاريخية ما شاء الله عليها..

ميشال عون: هل في دولة بلبنان على هالأسلوب هيدا ما تأسست الدولة..

إيلي ناكوزي: ما في دولة.

إذا لم يكن هناك انتخابات رئاسية؟

ميشال عون: لذلك اليوم لا ننعم بوجود دولة، لأن كل اللّي إجوا تسوية فإذن كان في عنا "دكان" سميها: دكان، سميها شركة، مركز، سوبر ماركت سميها اللّي بدك ياه، لأنه هي الطريقة ما عمرت.. ما بنيت دولة مجبورين نظل مستمرين فيها نحن حتى نعمل سوبر ماركت؟ لأ.

إيلي ناكوزي: يعني ما في انتخابات رئاسية؟

ميشال عون: ما يكون.

إيلي ناكوزي: شو منعمل ساعتها؟

ميشال عون: في 100 حل بس يكون فيه إرادة للحل.

إيلي ناكوزي: اطرح لي حل.

ميشال عون: هيدا الحل انتخابات مباشرة شو في مشكلة.

إيلي ناكوزي: انتخابات مباشرة ما رح.. كمان ما فيه قبول، في عم بقولوا لك البلد بتروح عالخراب..

ميشال عون: طيب شو بدي أعمل لك؟

إيلي ناكوزي: يعني وصلنا لموعد..

ميشال عون: بالانتخابات أنت إذا أخذت أصوات بتسقط، وإذا ما أخذت أصوات بتسقط ما كل المعركة من سنتين لليوم قايمينها نزلت شعبية الجنرال عون طلعت شعبية الجنرال عون مثل البورصة، ليه عم يعملوها هالمناورة كلها، طالما القصة قصة تسوية طالما القصة كلها قائمه على شو؟ على رفض الصفة التمثيلية لعماد عون ليه؟ لأنه بدهم يضعفوه، هالشغلة..

إيلي ناكوزي: أنت مش مؤمن أنه انخفضت شعبيتك بعد التفاهم.. أو حلفك مع حزب الله؟

ميشال عون: خيّو (أخي) أنا ما بؤمن أنا بهالـ.. الوكالة بالانتخابات تعطى لأربع سنوات، بالأربع أخذت ببعبدة عليّ محل ما سقطت ليحكي..

إيلي ناكوزي: طيب ليش ما صارت انتخابات مبكرة؟

ميشال عون: محل ما سقطت ليحكي 74% من الأصوات المسيحية..

إيلي ناكوزي: ليش بدك تعمل انتخابات مبكرة؟ ما زال الوكالة بتنعطى لأربع سنوات، الجماعة أخذوا وكالة عأربع سنوات!

ميشال عون: خيّ لأنهم أفسدوا اللعبة الدستورية حلوا المجلس الدستوري ما اكتملت، المجلس النيابي مش مثبت اليوم لأنه لم تنظر.. ينظر المجلس الدستوري بنيابة الـ..

إيلي ناكوزي: طيب لهذا السبب بدك تعمل انتخابات مبكرة جنرال؟

ميشال عون: ليش لأ؟ لكن يسرقوا السلطة! أيها أهم انتخابات مبكرة ولا سرقة السلطة؟ تصوّر أنه واحد يحكم لبنان زورهم أربع سنين وجيب رئيس لمدة 9 سنين لأنه هيدي بعد ثلاثة لمدة 9 سنين يؤمن استمراره من خلال رئيس جمهورية سرقة.. ما هيدي سرقة بيتحاكم عليها أي ساعة كان بتنكشف، هي انكشفت من قبل ما تبلش..

إيلي ناكوزي: أنت برأيك إذا صار انتخابات مبكرة السنة لن ينتخب سعد الحريري ولائحته، والدرزي لن ينتخب بقا وليد جنبلاط ولائحته وحزب الله ما رح ينتخب حزب الله والتيار العوني ما رح.. ما هي نفسها نفس النتيجة، فإذن..

ميشال عون: ينتخبوه عادي فإذن يحترمه..

إيلي ناكوزي: لأ. الفرق الوحيد أنك عندك حلف مع حزب الله جنرال؟

ميشال عون: الحكم الديمقراطي يرتكز على الصفة التمثيلية لإسناد (انقطاع الصوت) بدنا نحترم القيادة الأساسية نحن بنظام شبه فيدرالي طوائفي كل واحد ضمن طائفته إله الصفة التمثيلية، إله الصفة التمثيلية أنا آخذ الصفة التمثيلية أنا باسم الصفة بدي أشمل المركز اللّي أنا فيه بسيطة كثير، ولاّ غيروا النظام أنا زلمة عم بشتغل لنظام مدني يعني لا طائفي بيمشوا معي؟ إذن نبلش بالتشريعات.

إيلي ناكوزي: قلت كلمة كبيرة جنرال وهيدي يعني بسمعها منك من أيام باريس: "المجتمع المدني" طيب بتقول لي مجتمع مدني ومتحالف مع حزب الله، حزب الله حزب مؤسسة عقائدية أيديولوجية اسمها حزب الله، طيب يعني أنت كيف عم تحكينا عن دولة مدنية وأنت عندك تحالف مع حزب أيديولوجي بأيديولوجيته العميقة يريد أن يخاطب إسرائيل يريد أن يدمر إسرائيل وهو حزب ديني قلت إي أو قلت لأ هو حزب ديني، بس بدي الجواب بعد هالوقفة الإعلانية لو سمحت.

[فاصل إعلاني]

ما مدى نجاح مشروع الدولة المدنية؟

إيلي ناكوزي: جنرال قبل البريك كنا عم نحكي عن دولة مدنية اللي أنت كنت تدعي لها من.. حتى قبل أن تنفى إلى باريس، كنت دائماً صاحب مشروع دولة مدنية، وسؤالي: كيف هذه الدولة العلمانية الليبرالية المدنية شو بدك سميها وأنت متحالف مع أكبر مؤسسة عقائدية في البلد دينية؟

ميشال عون: مزبوط صح.

إيلي ناكوزي: كيف بتعملها هي؟ مش رح تصطدم بهالمشروع الثاني؟

ميشال عون: هلأ حزب الله وأمل بيمثلوا اليوم ثلث الشعب اللبناني، وإجينا عالأرض اللبنانية بدنا نتعامل نحن وياهم، بدنا ننطلق من التعامل مع مكونات المجتمع اللبناني ونشتغل ماضين لثقافة الدولة المدنية، الدولة المدنية ما بتسقط على الشعب من فوق مثل ما صار بتركيا عم نعيش الأزمة حالياً أتاتورك عمل دول مدنية ولكن الشعب ما صار مدني معه لأن الدولة لم تأتِ من القاعدة إلى القمة ولكن هبطت من فوق لتحت ما تبناها الشعب، نحنا عم نشتغل ثقافة الدولة المدنية، ولكن علينا من الآن حتى ننضج هالفكرة مع الشعب اللبناني علينا أن نتعامل مع القوى السياسية الموجودة، حالياً عندما رجعت من باريس جيت لقيت حزب الله متحالف مع كل القوى السياسية اللي معارضته اليوم، الوحيد أنا كنت خارج التحالف وكان حزب الله مع تيار المستقبل مع الجميع وعملوا الانتخابات سوا، وألفوا الحكومة سوا، وصلنا لمرحلة انكسر التحالف وقت اللّي انكسر التحالف وجدنا أنه في أزمة لأنه في قرار دولي اسمه 1559، طيب هيدا لوين بوصلنا؟ لانعزال! لحرب أهلية! جينا نحن تطوعنا وعملنا تفاهم مع حزب الله حول آلية لتطبيق القرار 1559، لماذا رُفضت هالآلية هيدي لم تكن لا اندماج سياسي ولم تكن تحالف ولم تكن.. إنما ورقة مكشوفة انوضعت على الطاولة أمام الجميع تعوا نناقشها إذا بتوافقوا عليها ولاّ لأ، فوراً حصل انحسار من جهة الحكومة من جهة بقية الأحزاب، واتهمت بأن الورقة سورية إيرانية وهي محض داخلية لبنانية لتسوية نقاط خلافية لبنانية..

إيلي ناكوزي: بما فيها سلاح الحزب.

ميشال عون: بما فيها سلاح الحزب هي الأساس كانت ورقة السلاح، ياللّي هو تضمن ثلاث فقرات هالحل، حل أنه إطلاق سراح..

إيلي ناكوزي: الأسرى.

ميشال عون: الأسرى، تحرير مزارع شبعا ياللّي هنّ 40 كيلو متر مربع ولكن خزان مياه، ومن ثم إدخال هذا السلاح ضمن إستراتيجية دفاع برعاية الدولة اللبنانية.

إيلي ناكوزي: طيب اسمح لي اسمح لي، فيه شيء غريب أنا بدي أسألك عنّه يعني أنت موقفك المعروف يمكن منذ أن كنت قائداً للواء الثاني موقفك: "لا بندقية إلا بندقية الشرعية" هذا الموقف اللّي ظليت تقاتل كرماله واللّي تبنوه اليوم الآخرين اللّي ما كانوا راضيين يتبنوا هذا الشعار، وقت اللّي تبنوه هنّ الجنرال عون غيّر وصار يقول أنه لأ ماشي الحال بدنا نلاقي حل، أنت أطلقته هذا الشعار بالبلد، التيار العوني ربح هذا الشعار، اليوم تيارك هذا التيار الكبير ربح على.. يعني وقت اليوم بسمع أنا باقي الفرقاء منّه الحزب الإشتراكي التقدمي، القوات اللبنانية لما بسمع القوات اللبنانية تقول: "لا بندقية إلا تحت ستار الشرعية"، بقول الجنرال عون: لأ جبناكم لهون غيرنا!

ميشال عون: لأ. هيدا وضع الشعار في غير سياقه التاريخي والظروف اللّي عايشها، كنا نقول: "لا إلا لبندقية الشرعية" يوم ما كان فيه احتلال لأرضنا، ومن وقت صار فيه احتلال لأرضنا صار بدنا وجدت البندقية بندقية المقاومة بالجنوب يوم اللّي كان الجيش ما يقدر يوصل عالجنوب، يوميتها كان الظروف.. ظروف احتلال الجنوب خلق المقاومة، بدك تشيل ظروف الاحتلال حتى ترجع تسحب سلاح المقاومة، ما نحن نسعى لإزالة ليش عم نقول تحرير مزارع شبعا وعودة الأسرى؟ لأنه هيدي الظروف ظروف الاحتلال والأسرى هنّ اللّي خلقوا المقاومة، بنزع.. بإلغاء هالظروف يلتقي ضرورة وجود السلاح في وجهة نظر..

إيلي ناكوزي: ليش.. ليش ما تحررهم دبوماسياً بقرارات دولية بقرارات.. ليش بدنا نعجل التحرر؟

ميشال عون: عشنا نحن القرار، الفلسطينيين انسحبوا من لبنان بسنة 1982 مش هيك؟ من سنة 1982 لحتى قدرنا فلّو الفلسطينية من الجنوب أخذت لسنة الـ يعني 18 سنة من بعد ما انسحبوا، ما حدا يقول لنا أن الدبلوماسية بتحرر شيء، لا بحياتها الدبلوماسية حررت حدا، ووقت اللّي بتحرر الدبلوماسية بتفرض شروط كثير قاسية على البلد اللّي بتتركه، وبتتركه تحت نوع من العبودية السياسية إذا تركته عسكرياً بتفاوض، فإذن هالمقاومة اللّي بدأت مهمتها سنة 1982 فيها تكمل لفترة كمان أخرى وتكمل تحرير الأرض، وخاصةً من سنة الـ 2000 لليوم إنا نعيش نفس الظروف ليه من سنة 2000؟ وقفت وقت اللي انسحبت إسرائيل من القسم الأكبر من الحدود، فإذن إذا استمرت لوقتها لهالوقت الحاضر ليش لهلأ نحن ما نوقف لها مهمتها شو الطارئ الجديد؟ خاصةً..

الطارئ الجديد في لبنان

إيلي ناكوزي: الطارئ الجديد أنه ما بقا فيه سوري بلبنان!

ميشال عون: ما بقا فيه سوري بلبنان بس فيه إسرائيلي بالجنوب، ما هي المشكلة ونحنا مع إسرائيل بحالة حرب منّا بحالة سلام، وهوني إذا بدهم يمشوا باتجاه السلام الانسحاب ضروري كخطوة أولى باتجاه السلام، لأنه طالما في أرض محتلة وطالما في أخطار وطالما أنه هالأخطار عم تتجسد بتصرفات عسكرية بتهديدات عسركية طالما الناس بدهم يظلوا حزنانين ويظلوا متمسكين بالسلاح، هون يجب أن نتساعد مع الأمم المتحدة مع الدول العربية لتخفيض درجة الخوف عند اللبنانيين اللّي ذاقوا الأمرّين من الاحتلال الإسرائيلي والاجتياحات الإسرائيلية حتى نوصل لمرحلة الهدوء والأمان.

إيلي ناكوزي: ما ذاقوا الأمرين من الاحتلال السوري حسب ما كنتم..؟

ميشال عون: لأ. نحنا اللّي ذقنا الأمرين من السوري، وهنّ ذاقوا الأمرين من الإسرائيلي، كلياتنا شبعنا من الاحتلال لذلك تفاهمنا على أنه ما بدنا حدا من الخارج.

إيلي ناكوزي: طيب، أنت ما قاومت السوريين عسكرياً؟ قاومتهم سلمياً للسوريين؟

ميشال عون: قاومتهم بعد التسعين..

إيلي ناكوزي: طيب ليش.. قاومتهم بعد التسعين لـ 2000 وكذا قاومت وكنت مؤمن بأنه سلمياً وكنت توصي تيارك عبر برنامجي أنه أوعى تستعملوا خيار العنف، انزلوا تظاهروا عبروا عن حقكم الديمقراطي لا تحملوا السلاح، بدنا نحرر أرضنا هلأ كمان مزارع شبعا..

ميشال عون: كل حالة إلها..

إيلي ناكوزي: ليش مزارع شبعا مختلفة؟

ميشال عون: كل حالة لها شروطها، معلوم.

إيلي ناكوزي: بدك 40 ألف صاروخ كاتيوشا يا جنرال مزارع شبعا!

ميشال عون: لا.. لا.. بدي قلك، شو بتتأثر إسرائيل إذا ما كان في حدا عم يزعجها على حدودها؟ ظل احتجّ من هلأ للفلسطينية في القرار 194 قرار العودة من سنة 1949 يمكن أو 1948 شو عملوا ولا فلسطيني رجع بعدهم اللاجئين عم يزيدوا، مع إسرائيل ولا مرة صار فيه أي شيء إيجابي إلا من خلال المقاومة، لأنه ما تعودت إسرائيل اللّي أنشأت بقرار دولي لم تحترم يوم القرارات الدولية..

إيلي ناكوزي: طيب، ظل قاتلها أنا اللبنان الصغير اللّي ما عنده أمل بالحياة إلا إذا بعيش بسلام، أنا لا بقدر عمّر بلد ولا بقدر رجع المغتربين والمهاجرين، يعني كل سنة بعمل عمليات مقاومة تحرر مزارع شبعا، بدمر البلد..

ميشال عون: لا.. لا هذه غير ممكنة.

إيلي ناكوزي: ومنقول نهارت إسرائيل لأنه استقال رئيس الحكومة.

ميشال عون: لأ.. لأ هيدي مش منطق.

إيلي ناكوزي: طيب شو المنطق اللبنانيون بدهم يقاتلوا بعض؟

ميشال عون: أهدأ ظروف صارت على الحدود اللبنانية الإسرائيلية من بعد الـ 2000، من بعد منها ظل فيه وجود مقاومة..

إيلي ناكوزي: محدودة.

ميشال عون: كانت العمليات تذكيرية كانت عمليات تذكيريه أنه عندنا أرض محتلة رمزية، بس ولكن هلأ نحن قررنا بهالورقة نوصل على تنفيذ القرار 1559 بطريقة سلمية، غيرنا قرر بده يوصل لها بطريقة عسكرية، هلأ فشلت الحرب هل هناك نسبة بتخطط لحرب ثانية مع حزب الله ومع لبنان؟ أو.. ممكن فإذن ليه ما نعطي حق للي عم يخططوا هنيك ما بدنا ندعم اللّي عم بحاولوا بطريقة سلمية ينهوا قضية السلاح وتحرير الجنوب، ما نحن مش حاطين البندقية وعم نقوس هلأ، ولا حاطين الصواريخ وعم نرشق فيهم، هلأ الاثنين نحن عايشين في حالة هدوء على الحدود، بهالحالة الهدوء هيدي تعالوا نتفاوض على خروج إسرائيل من مزارع شبعا وعلى ردّ سلاح حزب الله إلى الخطة اللّي كنا نحن واضعينها.

ورقة التفاهم حول سلاح حزب الله

إيلي ناكوزي: جنرال بورقة التفاهم اللّي أنت يعني كثير ناس بقولوا: "حلف" وأنت بتقول: "تفاهم" يعني فيه فرق بين التفاهم مع شخص آخر والحلف معه، في هذه ورقة التفاهم إذا الإسرائيلي انسحب من مزارع شبعا وصار فيه تبادل للأسرى وعودة الأسرى، طيب أنا شو بيضمن لحزب الله ما يقول بكرة بدي عودة اللاجئين وبدي يستتب الوضع ويستقر بفلسطين وبدي دولة فلسطينية، ونظل نحدد كل مرة هدف أكبر للتخلي عن السلاح، أنت شو هو موقفك حاكي معهم بهالشي؟

ميشال عون: هلأ بدي قول لك، المهم أنه سلاح حزب الله بصير سلاح من ضمن إستراتيجية للدفاع عن لبنان.

إيلي ناكوزي: راضي حزب الله بهالحل يعني..

ميشال عون: خيّ على الأقل أنا بدل ما تلومني ليش عم بحكي مع حزب الله أنا عم بتلزم بهالحل.

إيلي ناكوزي: مع حزب الله.

ميشال عون: مع حزب الله بضمن التفاهم على النقطة هيدي، هالسلاح بده يصير بضمن إستراتيجية دفاع يعني الدفاع ما منهاجم إسرائيل، إذا إسرائيل هاجمتنا منستعمل السلاح ضدها، هل هيدا حق مشورع؟ إي ولاّ لأ؟ هذا حق مشروع، يعني عم.. مش عم نقول بدنا نعمل حرب وقائية إذا جمّعت إسرائيل وبدها تهاجمنا، عم نقول إذا هاجمتنا إسرائيل..

إيلي ناكوزي: بكون هذا السلاح دفاعي؟

ميشال عون: دفاعي، ما منستعمله إلا إذا إسرائيل بدها تجتاحنا، فإذن من هون هيدي فكرنا السلمي بيدعينا لحل مثل هيدا بمرحلة أولى، وبعدين هالشيء هذا بيتطور حسب الظروف السياسية بالمنطقة وحدودنا، لأنه نحن مش منعزلين عن سوريا مش منعزلين عن إسرائيل متلاصقين، وفي اليوم مبادرات سلمية بدنا نتفاعل معها إجباراً، إجباري بدنا نتفاعل معها إيجابياً، كل التفاعل الإيجابي بصير بالمنطقة بدنا نتفاعل معه نحن مش خارج إطار موافقين أصلاً على مبادرة السلام، ممكن صار مفاوضات بواشنطن وبمدريد، أولاً بمدريد وبعدين بواشنطن حول السلام، ولكن بدك تحضر له ظروف للسلام ما فيك تجي تقصف بالطيارة وتقصف بالمدفع وتقول بدي إجتاح وبدي أقتل وترجع تقول مثلاً.. مثل ما عم بصير حالياً، يعني بقولوا لك في تهريب سلاح، هلأ تهريب ما تهريب أنا مو مقتنع فيه تهريب لأنه في سلاح كفاية يمكن لو فيه حاجة كان بصير فيه تهريب وإسرائيل بتهدد أو في أشخاص لبنانيين عم يقولوا في حرب إسرائيلية جاية بالصيف على لبنان، بترجع بتلوم أنه حزب الله عم يتسلح، يعني بأي منطق بتقول له: جاية إقتلك وكيف أنت عم تتسلح! هدول اللي عم يشتغلوا هيك عم يشتغلوا لحتى يخلقوا دائماً جو بالقلق وعدم الاستقرار ويحضروا ظروف حرب، إنما وقت اللّي بدك تسعى للسلام بعدين من جهة ثانية ما بدك تهدد بدك تعلن عن نية سلام، من جهة ثانية الآخر ساعتها بيعلن عن نية سلام، بصير فينا نحاسبه إنه ليه خيّ عم تتسلح المنطقة ماشية باتجاه السلام.

إيلي ناكوزي: واضح. بس يعني نحن هل لبنان برأيك مستعد أو أنت مستعد في حال برجع بقول انسحب الإسرائيلي من مزارع شبعا ما بقى فيه أرض محتلة بلبنان، هل يعني مستعد أنك تخوض مفاوضات سلام مع إسرائيل أو بدنا ننتظر السوريين وننتظر الوضع الفلسطيني ونربط الوضع اللبناني كله بمركز الصراع العربي الإسرائيلي، أم لبنان بيقدر يدخل لحاله بسلام مع إسرائيل بمعاهدة سلام؟

ميشال عون: نحن من ضمن مبادرة السلام العربية عم نشتغل، ومؤتمر الرياض بعتقد أنه المبادرة واضحة وما رح نتفرد لحالنا منشتغل من ضمن هالمبادرة هي..

إيلي ناكوزي: إذن أنت بدك لبنان يعني يشتغل ضمن هذه المبادرة بحل للجولان وللقضية الفلسطينية وللبنان..

ميشال عون: مثل ما هي مثل تقدمت عربياً هيدا الحد الأدنى من التضامن العربي بدنا نحافظ عليه نحن.

إيلي ناكوزي: وبالانتظار نبقى هيك بحالتنا الحالية أنه ممكن بكرة مشكل عالحدود نرجع ندمر البلد.

ميشال عون: لأ، نحن في عندنا الأرض.. إي أكيد نحن بحالة حرب مع إسرائيل، ما فينا ننتقل من حالة حرب إلى اللاشيء إلى السلام بدون ما نستعيد أرضنا!

إيلي ناكوزي: فيه فريق بالبلد ما بده يقاتل إسرائيل، يعني مش بده يعقد صداقة مع إسرائيل بس عم يقول ما عندنا القدرة لو عندنا حزب الله وحزب مقاوم بس لبنان لا اقتصادياً ولا اجتماعياً لا يحتمل أن يقاوم على الطريقة اللبنانية على طريقة حزب الله، يحتمل المقاومة إذا بدكم مثل ما عم يقاوموا السوريين بالجولان أو مثل ما عم يقاوموا كل الجبهات العربية المفتوحة أنه يا أخي منعمل هيك مقاومة فيها بيانات استنكار فيها بس مش ضروري يعني كل شهر شهرين ندمر البلد، فـ.. طيب هذا الفريق شو بدنا نقول له لأ..

ميشال عون: شو بدك استعادة لواء الإسكندرون يعني؟

إيلي ناكوزي: لأ.

ميشال عون: شو لكن؟

إيلي ناكوزي: بدي أنه إذا فيه حرب يتفق اللبنانيين كلهن.. هذا المأخذ الآخر على مشروع حزب الله أنه مش فريق واحد بيقرر متى بتبدأ الحرب ومتى بتخلص الحرب! يعني هذا بده إجماع ما بده إجماع لبناني؟

ميشال عون: خلص هلأ في الأمم المتحدة صار فيه قرار جديد بيذكر فيه مزارع شبعا أكيد التكتيك بده يتغير هالاثنية، مين عم يقول التكتيك ما بده يتغير؟ بس التهديدات الإسرائيلية بعدها موجودة، كمان..

إيلي ناكوزي: رح تظل موجودة.

ميشال عون: بده يظلوا الناس نحن مجبورين الناس يدافعوا عن حالهن حتى نبني قوتنا الذاتية تصير كافية، وقوتنا الذاتية ما رح نكتفي بجيش كلاسيكي إذا فيه تهديدات جيش كلاسيكي ما بيكفي، بده نوع من المقاومة الشعبية مثل ما عاملينها هم بإسرائيل بالمزارع عالحدود كلهم مجهزين للدفاع عن نفسهم، سويسرا معتمدة النظام في كثير دول معتمدة النظام المشترك بين المقاومة يعني نوع من الحرس الوطني والجيش النظامي، ليه ما منعتبرها نحن هيك.

إيلي ناكوزي: رح نتوقف كمان مرة مع بريك أخير من بعده منحكي عن تحديداً الفرق بين التفاهم والحلف، وبالتالي يعني إذا لا سمح الله كما عم نسمع سيناريوهات ونقرأها صار حرب جديدة على لبنان بتموز المقبل كما عم نقرأ أنه الجيش الإسرائيلي وإسرائيل ستنتقم لما حدث لها..

ميشال عون: منتمنى يكون لبنان حزب الله تكون زايدة الذخيرة تبعه..

إيلي ناكوزي: طبعاً.. (ضاحكاً) هي على لسانك مش على لساني، منتوقف مع بريك أخير.

ميشال عون: لأ ما عم تقول لي عم يتهموك بتهريب السلاح طيب كيف بدك تنتقم طالما عم يحضروا لحرب.

إيلي ناكوزي: رح نحكي عن هالموضوع بعد هالبريك الأخير.

[فاصل إعلاني]

قصة "غرام سياسي" في الشارع اللبناني

إيلي ناكوزي: منتابع إذن هاللقاء بشقه أو جزئه الأخير، جنرال أنا جيت (جئت) بعد ثلاث أو أربع سنين على بيروت ويعني فعلاً بالشارع لقيت فيه قول قصة "غرام سياسي" بين مش القادة السياسيين بحزب الله وعندك من الناس يعني، بأخذ من شباب كنت أنت فيهم وقت كنت بعدك بباريس اليوم بحكيهم عنده منطق آخر للأمور عندهم مقاربة أخرى، طيب يعني هي قصة الغرام أنا بعد ما عم بفهمها، لأنه خطاب الحزب يعني بعده ثابت من 10 سنين ما تغير، يعني كان يقول دائماً: هذه البندقية لن تحول إلى الخارج، هذه البندقية موجودة لمقاومة إسرائيل فقط، كان دائماً يقول يعني أنه نحن أولوياتنا قبل أي شيء آخر هو مقاومة العدو وإزالة الاحتلال، هل أنت اللي تغيرت لأنه الحزب حزب الله ما تغير، بس أنت ما كان عندك هالموقف وتيارك ما كان عنده هالموقف الإيجابي من حزب الله مثل ما عم تقول اليوم..

ميشال عون: بالعكس فيه صار فيه تعديل كثير بخطاب حزب الله السياسي، إنما يمكن مش عم ينوضع يعني تنوضع الإضاءة اللازمة على التغيرات اللي صارت بخطاب الحزب، خطاب الحزب كان عنده خطاب شامل لتحرير فلسطين المحتلة، "إنا قادمون يا قدس" تحرير القدس "زحفاً زحفاً نحو القدس" تحرير الأسرى العرب والفلسطينيين من السجون الإسرائيلية، تحرير الجولان "الحل الشامل" في "القرى السبع" كل هالمواضيع كانت واردة بالأدبيات الخطابية، كان كمان جزء من اللاجئين إلى إسرائيل كانوا جزء من خطابه السياسي عدل كلمة يعني وحطينا شرعة سلام على الأرض اللبنانية، كلهن هذول تغيروا من خطابه، والتزم فقط بالأرض اللبنانية، فقط بمزارع شبعا وبالأسرى اللبنانيين، بعتقد هيدا التغير مهم جداً وكمان عدم استعمال السلاح التزم فيه، تعرضنا كثير لمشاكل أثناء الاعتصام ومظاهرات ولكن لم تستعمل ولا بندقية في الداخل، وبعدنا على هالاستعداد وبعدنا على هالتصرف، نحن بالتيار الوطني أصلاً منّا مسلحين يعني عسكرياً وصار عندنا إصابات بالرصاص، وكمان ما حاولنا نستعمل بتعرفي أنه بلبنان بكل بيت فيه بندقية، ولا حدا حاول يستعمل السلاح.

إيلي ناكوزي: يعني فينا نقول خطاب الحزب تغيّر شوي وأنت تغيّرت شوي وصار في هاللقاء؟

ميشال عون: وهي الغاية ونحن قايمين..

إيلي ناكوزي: أنت كمان تغيرت جنرال؟

ميشال عون: لازم نتغير.

إيلي ناكوزي: يعني خطابك عن حزب الله بالماضي مختلف عن خطابك عن لحزب الله اليوم؟

ميشال عون: بالأساس بس طلع القرار 1559 قلنا يجب أن يسلم حزب الله سلاحه لا أن ننزع سلاحه بالتعبير..

إيلي ناكوزي: وهذه اعتبرها إيجابيات.

ميشال عون: قال كلمة تسليم السلاح يعني تفاهم على إنهاء دوره أو على وضعه بشكل أو بآخر مش بسلطة بعهدة الحزب بده يصير جزء من آلية معينة تستعمل في الدفاع عن لبنان طالما هالشيء ضروري، طالما نحن بحالة حرب، هلأ شو رأيك نحن لما نسأل المجتمع الدولي من خلال محطتكم خلص الحرب بـ 14 آب لغاية اليوم بعدنا عايش حالة وقف الاعتداء وليس وقف إطلاق النار، لماذا؟ عم نعرف أن إسرائيل صارت تخرق كل يوم جوياً وبالجمعة ما بعرف كم مرة برياً، بينما حزب الله لم يخرق هالوقف الاعتداءات ولا مرة، لماذا هالإصرار على البقاء على هالحالة هيدي، مش نحن مش عم نطور الحالة باتجاه الهدنة أو باتجاه السلام، إسرائيل والأمم المتحدة موقفتها عند وقف الاعتداء ما وصلتها لوقف إطلاق نار.

إيلي ناكوزي: طيب، جنرال يعني بختام هالحلقة تنطلع هيك كمان بخلاصة يعني اليوم الوضع راوح مكانك، الحكومة الحالية مصرة على مجموعة من المواقف تبدأ بالمحكمة يعني كأساس لطرح مبادلة حل، الفريق الآخر يقول المشاركة أولاً ثم المحكمة، والنتيجة واقفين، عم نحكي برئاسة الجمهورية يبدو أنه لأ أنت مش متوافق معهم عالكلام اللي عم يحكوا اللي عم بسمعه منهم، أنه مرشح تسوية هذا أنت منك ماشي حسب ما قلت لي بهذه الحلقة، مالك ماشي على الأقل باللي عم يطرحوه أنه واحد ما يكون لا ينتمي لا لهذا الطرف ولا لذاك الطرف منك راضي، طيب شو مبادرتك هلأ للحل، يعني إذا بدنا نطرح مبادرة تحرك ترجع عجلة البلد، تحرك يعني مجلس النواب الحكومة انتخابات رئاسية، شو بيطرح ميشال عون من خلال العربية ليعني إعادة انطلاق الدورة الطبيعية للحياة السياسية بالبلد؟

مبادرة عون لعودة الحياة السياسية الطبيعية إلى لبنان

ميشال عون: كنت بمناسبة 14 آذار قلت يعني التزمت معنوياً بتقديم مبادرة، عندما يتعب الأفرقاء بعد لحد هلأ تية ما شفت شو عم يتابعوا بس فيه بوادر تعب عليها، لأنه طالما مش تعبانين من.. ما حدا برد يعني ولا رح بيرجع لصوت العقل..

إيلي ناكوزي: الناس تعبانين.

ميشال عون: الناس تعبانين يعني هيدي مسؤولية الناس كمان هم جددوا لهالنظام بمرحلة أو بأخرى هم الساكتين.

إيلي ناكوزي: طيب، على شو بتقوم يعني فيه مبادرة للحل يعني مننتظر لتستوي الأمور يعني يتعبوا عالآخر ينهاروا الأفرقاء ليش ما تنطرح هلأ؟

ميشال عون: هلأ رح تنطرح.

إيلي ناكوزي: إيمتى؟

ميشال عون: قصة أيام يمكن أو أسبوع.

إيلي ناكوزي: على شو بدكم عنوانها الأساسي شو؟

ميشال عون: عنوانها الأساسي على تصور حل شامل، طبعاً الحل الشامل في له أفضلية بالتسلسل الأحداث تبعه، وطبعاً فيه الأشياء المحلية اللي مطروحة وفيها قصة القرارات الدولية أيضاً..

إيلي ناكوزي: يعني هذه المبادرة رح تشمل موضوع المحكمة الدولية وموضوع الحكومة وموضوع انتخابات الرئاسة؟

ميشال عون: كل الأمور سوا، بتنحط بجدول يعني بتتجدول، هلأ طبعاً بدك قبول الأطراف بالمبادرة حتى يحكوا مع بعضهم وحدة، واثنين: بدنا الحد الأدنى من الضمان الداخلية مش الخارجية، الخارجية لا أؤمن فيها، الضمانات الخارجية إجتنا أن سوريا بتنسحب من لبنان سنة 1992 عملت انتخابات برعايتها وما فلّت إلا بالـ 2005 بدي الضمانات الداخلية بتكون من خلال أشخاص بيحترموا حالهم وبيحترموا القانون..

إيلي ناكوزي: يضمنوا شو يضمنوا المبادرة؟

ميشال عون: المبادرة وعليها يأخذوا موقف من.. لذلك أنا مصرّ على شخصية الرئيس أن يكون هو الضامن الأول، وساعتها يكون هو الشاهد الأول على الأقل على التفاهم وعلى تنفيذه.

إيلي ناكوزي: هل بيرضى تيارك بشخص غيرك بقصر بعبدة؟

ميشال عون: هلأ تية..

إيلي ناكوزي: شعبيتك الناس اللي وقت حكيت على رئاسة الجمهورية سفقوا وصرخوا جنرال وما.. بيرضى تيارك بشخصية أخرى؟

ميشال عون: لأ. أكيد بدها تكون صدمة كبيرة صدمة لكل المسيحيين، أنه وقت اللي المسيحيين ما بيقدروا بـ 70% منهم وما فوق يعني حتى ما نحط الفواصل ما بيقدروا يجيبوا رئيس جمهورية غيرهم بده يجيب لهم رئيس جمهورية، هذول خايفين أنه يجي المسلمين ينتخبوا رئيس الجمهورية هون ما هم ذاتهم شو بمثلهم المسيحيين.

إيلي ناكوزي: طيب، فإذن يجب أن يقتنع الفريق الآخر بمشيل عون رئيساً للجمهورية.

ميشال عون: هيدي أنا ما بتنازل عنها، هلأ بدهم يشلحوني ياها يشلحوني ياها أنا ما بتنازل عن ترشيح نفسي لرئاسة الجمهورية هلأ ما بدهم يؤيدوني ما يؤيدوني..

إيلي ناكوزي: بصير انتخابات..

ميشال عون: يسقطوني، بس لا يمكن أن أتنازل عن وكالة لآخر ولا أستطيع أن أضمن ضمن الظروف الحالية أي شخص آخر بأيده، أكيد لن أؤيد أي شخص آخر لأن مرقت سنة الـ 1990 ومرقت بعدين هلأ بالأزمة بعرف أديش بده يكون عنده الإنسان شجاعة أدبية وأديش يمكن بيهوى المخاطرة حتى يقدر يوقف بمواقف سياسية تبقى منقذة لوطنه.

إيلي ناكوزي: يعني هيك باختصار شديد عم بختم إذا اتفق على شخص أنت يعني بتوافق عليه يعني شخص بترضى أنت..

ميشال عون: أنا من هلأ عم قول لك لن أوافق على أحد لأن أنا أشك بنفسي بالظروف اللي مرقت فيها إذا بتتكرر مرة ثانية أني ما إنتعش..

إيلي ناكوزي: طيب فإذن محسوم الموضوع هيدا..

ميشال عون: بالنسبة إلي محسوم بالنسبة لغيري يصطفل..

إيلي ناكوزي: إذا انتخبوا رئيس..

ميشال عون: ينتخبوا..

إيلي ناكوزي: الأكثرية النيابية..

ميشال عون: الأكثرية ما في.. ما عندهم نصاب، إذا صار عندها نصاب..

إيلي ناكوزي: بالدورة الأولى لأ بالثلثين بعدين بزائد واحد.

ميشال عون: بس إذا إجو الثلثين، بس تؤمن الثلثين أوكي بس أنا لن أوافق على أي رئيس، أنا مرشح ما حدا فيه يطلب مني إلي التهذيب السياسي أنه ينطلب مني أني أوافق على واحد آخر، ليه بدي وافق على واحد آخر شو السبب؟ إذا أنا بده موافقتي الآخر فإذن أنا الأحرى أنه كون أنا الوكيل بدل ما جيب واحد كون أنا عليه وصي، هذه لغت الوصايات لأ.. أنا مرشح يا بسقط يا بنجح.

إيلي ناكوزي: بالمجلس النيابي.

ميشال عون: بالمجلس النيابي، أو قدام الشعب ساعتها بكون سعيد جداً بخلص من الحرس وبخلص من كل شي لما..

إيلي ناكوزي: جنرال يعني أنا بتمنى لك التوفيق طبعاً، أكيد كلامك رح يثير ردود بكرة معود عالناس على كل حال..

ميشال عون: طيب فيه شي شو الغريب يعني..

إيلي ناكوزي: لأ، عم تقول أنا المرشح الوحيد ما في غيري يعني عم تقول لهم كل كلامكم هذا كلام السياسة الفارغ.

ميشال عون: نحن اليوم أمام انتخابات رئاسية بفرنسا في سيغولين رويال بتقول أنا وهو عم يقول أنا بتقول له لأ استقيل أنت عين واحد بدلك.

إيلي ناكوزي: نحن مش بفرنسا نحن ببلد طائفي فيه طوائف فيه تسويات فيه توافق..

ميشال عون: ما أنا عندي صفة تمثيلية عن مش عم بدعي.

إيلي ناكوزي: لأ. صح بتمنى لك التوفيق..

ميشال عون: ميرسي.

إيلي ناكوزي: على كل حال وإن شاء الله اللقاء الجاي منعمله بقصر بعبدة، جنرال عون شكراً لإلك وطبعاً شكراً للمشاهدين على أمل أن نلتقي فيكم أيضاً بحلقات أكثر من لبنان عن الملف اللبناني وتحديداً الملف الرئاسي وملف الأزمة القائمة بلبنان، شكراً جنرال عون.