جماعات الجاكتات والطرابيش إلى بكركي يميناً ويساراً در

بقلم/الياس بجاني

بتعرفو شعبنا عفور متل ما قال فليمون وهبي الله يرحمو وكمان طنبوز وكريم وبيحب الوجبات، من تهاني وتعازي وغيرا خصوصاً يلي منها فايدي ومصلحة وهبرة ونيابي ووزارة ووظائف محرزين.

طيب اذا ع الفاتيكان راحو 5000 لبناني من الهوامير يعني من اصحاب الطيارات الخاصة وسمسرة بيع اراضي المسيحي والأرصدة المنفوخة بالبنوكي تا يعملو واجباتون مع سيدنا الراعي ودفعو ع القليلي 10 ملايين دولار مصاريف ع حفلات وهدايا وعزايم!!

طيب اليوم وبكرا (الجمعة والسبت) التهاني ببكركي دخلكون كم ألف راح يهنوا سيدنا ويشوفو خاطرو؟

يلا اليوم ايام جماعات الطرابيش والجاكتات وسيدنا ابداً مش زعلان ما هو متل الشجرة بينحني كل فترة وفترة بتواضع حتى نقطف واليوم الشباب طالعين يقطفو ويعبو السحاحير والخوابي.

فرصة لاحقو حالكن ويومين مش قلال يعني في مجال وفرصة للكل يزبطو حالن ويقطفوا ويعبو ويعملو قصايد مدح متل ايام عكاظ، الله يرحمها.

اكيد خينا سجعان قزي وكرمال خاطر الجميلين راح يحمل كارثية زيارة 14 آذار الى غزة لعند سيدنا ويشتكي لأنو زعلان ومكدر خاطرو وعا شوي كان راح ع المنار وأعلن الحرب من هونيك متل ما كان اعلنها ع فارس سعيد. الله ستر وما عملها.

على كل حال سيدنا متواضع وما بيقدر إلا يحب ويشارك لأنو هيدا شعارو. مشارك جورج بشير وميشال سماحة والبقرادوني والفرزلي وعون وفرحات وصفا ورعد وقاسم والإستاذ بري وفخامة الجنرال والصهر ومش ناسي بشركتو جماعة قدامى القوات على اساس يلي ما عندو قديم ما عندو جديد.

ع سلامتو سيدنا ما بينسى حدا ولا حتى المتهمين الأربعة من حزب الله بقتل الحريري وما بدو ع قاعدة المحبي والشراكة حدا يجيب سيرتون لا بالمنيح ولا بالعاطل. وبمحتو كمان عم يصلي لحكومة القمصان السود!!

وكمان بشركتو وشراكتو وبمحبتو ما بدو يلي متهم باغتيال بطرس حرب حدا يجي صوبو والدولي سمعت منو وما قربت على المتهم الإلهي والمقدس. وكيف بدا تقرب وهو مقاوم وممانع! ما بيصير.

وأكيد سيدنا محضر اليوم وبكرا مع غياض باب كبير تا يحكي هو ويلي بيحبوا يحكو ورا البواب المسكرة وراه.

كمان سيدنا راح يشارك وبمحبة كل يلي بيحبوا يحكو وراء الأبواب وفاتح بواب بكركي بوجون ومش مسكرها.

نيالنا نحنا الموارني شركة مع الكل ومحبة ع الواسع وشو بدنا احسن من هيك حال.

يلا يومين وبيخلصو وبيرجع سيدنا بيكمل زياراتو وبعد في كتير محلات وبلدان لا زارا ولا اخدلون شركتو والمحبي.

المهم شباب الطرابيش والجاكتات ما يفوتو الفرصة لا اليوم ولا بكر والباقي ع الله. وسامحونا

ملاحظة: تفتح بكركي ابوابها يومي الجمعة والسبت لتقبل التهاني

*الكاتب معلق سياسي وناشط لبناني اغترابي
عنوان الكاتب الالكتروني

phoenicia@hotmail.com

تورنتو/كندا في 28 تشرين الثاني/12