ليش يا شباب

بقلم/يوسف أمين

قبل ما بلش حط افكاري الي كنت من زمان عم حاول انو نفسها بلعب الرياضة والهجرة من لبنان ومحاولة انو فتش عن طريقة تنسيني كل شي اسمه عقيدة او ايديولوجيا او مبادئ او كل الصفات الي عم يسممولنا سمعنا فيه ويعمولنا نظرنا فيه ويغسلولنا دماغنا فيه (مع العلم صرت شك انو بعد في عنا دماغ). يا شباب قبل الكلام حبيت حط صورتين من القرآن الكريم وكم مثل صغير بيفسروا الوضع الي عم نعيشه، وبحب انوا تتمعنوا بها الصورتين الكريمتين والامثلة الصغيرة قبل ما تتنطحوا وتطلعوا بأي مقابلة تلفزيونية وتبلشوا تنشروا عليها كلام اقل ما فيه انو القرآن الكريم نبه عليه من 1400 سنة.

قُلْ أَعُوذُ بِرَبِّ النَّاسِ مَلِكِ النَّاسِ إِلَهِ النَّاسِ مِن شَرِّ الْوَسْوَاسِ الْخَنَّاسِ الَّذِي يُوَسْوِسُ فِي صُدُورِ النَّاسِ مِنَ الْجِنَّةِ وَ النَّاسِ.

قُلْ أَعُوذُ بِرَبِّ الْفَلَقِ مِن شَرِّ مَا خَلَقَ وَمِن شَرِّ غَاسِقٍ إِذَا وَقَبَ وَمِن شَرِّ النَّفَّاثَاتِ فِي الْعُقَدِ وَمِن شَرِّ حَاسِدٍ إِذَا حَسَدَ.

رحم الله امرء عرف قدر نفسه وتوقف عندها.

وإذا اتت مذمتي من ناقص...، المكتوب بينقرا من عنوانه...

ربنا السلام لاسمه، هو الي خلق الكون وحسب العهد القديم خلص من الخلق بستة ايام وارتاح باليوم السابع. نحنا بلبنان بعد ما وصلنا على اليوم السابع.

ربنا السلام لاسمه، حط قصة قايين وهابيل ليعطينا مثل على الي بدنا نواجه بحياتنا الطويلة بهالكون،

يا شباب ما حدا عم ينكر عليكم حقكن، ما حدا عم ينكر عليكن حقوقكن، بس حقكن ما بيعني انو تتطاولوا على العالم وعلى الوطن. صاحب الحق سلطان، والسلطان بهالايام مش مطلوب منه انو يكون متمسك بالجهل الي كانو عليه السلاطين ويتصرف بعنجهية وبطريقة "انا ومن بعدي الطوفان".

نحنا عايشين عصر الانترنت، عصر العلم والمعرفة، عصر الاكتشافات العلمية، عصر التواصل بين الامم، عصر صار ابنك الي عمره عشر سنين ممكن يخبرك وبطريقة علمية كيف بيصير الحبل، صرنا بعصر ما بقا تمرق قصة الملفوفة والعصفور على اولادنا.

كيف بعدكن مصدقين انو نحنا مصدقين انكن ابرياء ونضاف وانو انتو ما تعاملتوا مع حدا غريب، يا شباب عندكن كل الحق انكن تحبوا مين ما بدكن بس المطلوب منكن انو تحبوا لبنان اولا وبعدين تحبوا ربنا الي اذا فعلا انتو بتحبوه متل ما على طول بتحكوا، ما بتطاولوا على كنيسته وجامعه وخلوته.

وقت الي بتسبوا انسان يعني عم تهينوا ربنا، عم تهينوا الكنيسة وقت الي بتسبوا او بتستهتروا او تتمصخروا على اي مسيحي.

وقت الي بتسبوا انسان يعني عم تهينوا ربنا، عم تهينوا مسجد وقت الي بتسبوا او بتستهتروا او تتمصخروا على اي مسلم.

وقت الي بتسبوا انسان يعني عم تهينوا ربنا، عم تهينوا الخلوة وقت الي بتسبوا او بتستهتروا او تتمصخروا على اي درزي.

عيب يا شباب،

نحنا كنا فخورين ايام المدرسة وكنا ننبسط وقت الي كان الاستاذ او جدي او والدي يخبرونا عن الاستقلال والرجال الشرفا الي قاوموا ليحصلوا على الاستقلال. كنا كتير مبسوطين وقت الي كنا نسمع مسرحيات الرحابنة ونسمع كلام العز والمقاومة والتضحية للوطن وكنا نكره المنافقين والي كانو يتعاملوا مع المحتل ضد الوطن، كنا نشوفهن باكتيريا حرام تكون موجودة "بس انا كمسيحي مقتنع انو لولا وجود يهوذا الاسخريوطي ما اكتملت رسالة المسيح" مع فرق واحد الاسخريوطي انذكر بالكتب المقدسة، انتو ما بعرف بأي كتب رح تنذكروا (على فكرة، تنذكروا وما تنعادو).

كنت حابب خبر ولادي عن زعماء لبنان الاشاوس وعن خطاباتهن الي بترفع الراس، وقعت بالحيرة، اي خطاب بدي احكي عنه، الزنار والنازل او البسينات او العهر أو أو أو، قلنا مش مشكل اكيد رح خبرهن عن اخلاقهن الحميدة، طلع معي الشب المهيوب الي عم يتطاول على البطريرك (راس الكنيسة) او على المطران عودة، او على سماحة المفتي أو أو أو. حابب خبر اولادي عن المحبة والمسامحة الي حكي عنها السيد المسيح بيطلع من منطقة تمخضت فولدته واحد حاطط هدف حياته الانتقام، قلنا مش مشكل منترك المسيحية ومنروح عند اخوانا الاسلام، بيطلعلنا كل مهيوب متخبا الله واعلم وين عم يسوق جماعته ليروحوا على الموت وزرع الكراهية بقلب اخوانهم وبيقلك انو هو نظيف، منترك الاسلام ومنروح عند اخوانا الدروز، شو بدي خبرك، حدث ولا حرج يا اخي انا بعرف انو كل عمرنا الفلاحين منستعمل مواد طبيعية او كيماوية لنقوي الزرع ويطلع بسرعة، بس لليوم مش عم بقدر اعرف شو هي هالمواد الي طلعت الوهاب الموهوب. اذا بدنا نحكي اكتر بخاف انو ما تساع الصفحات، رح اختصر.

المطلوب منكن كلكن لانوا ما حدا فيكن منزه عن العيب، ما حدا منكن ما كان عنده شطحاته، كلكن عملتوا مصاري وزعما على ضهر البلد والشعب، كلكن معروفين ما حدا منكن قديس، اليوم المطلوب من كل البنانية انو هالعقل الي عندهن الي عم يستعملوه ليسحرو العالم كله بنسب الذكا والحضارة والرقي، استعملوا هالموهبة لحتى تفرقوا بين الزعيم والبناني، الزعيم مستعد انوا يدعس عليكم ليوصل، بس البناني بدو يوقف معك لتوصلوا مع بعض، واتذكروا شغلي وحدة انوا طانيوس شاهين كان فلاح ووصل ليشيل الظلم مع اخوانه بالوطن، وانتبوا "اخوانه بالوطن" مش اخوانه الي برا، هول همهن مصالحن، خييك عم يموت واختك وامك وبييك مش خيو واخته وبيو وامه، معادلة صغيرة، شو عم يعطيك الزعيم، ليش بس بتزقف وما بتحاول انو تسألوا سؤال واحد، لانك بتخاف انو يقلك انك خائن، يعني الي ما بيوافقوا وبيمشي على ذوقوا بيكون خائن ومصيرو النار.

يا شباب النار ارحم من دعوة ام او ارملة او ارمل او يتيم عليكن بسبب الي عم تنفذوه. اتقوا ربكن حرام عليكن وعيب يا شباب.

بيروت في 10 تموز 2008